ગઝલ

પ્રેમ જોવો છે તો દ્વારે આવકારીને જુઓ

એ ન લાગે ઠીક તો જાતે પધારીને જુઓ

આમ નીરખી નહિ શકો આ દર્દમય દિલને તમે

આંખ પરથી ગર્વના પડદા ઉતારીને જુઓ

સ્હેજમાં દિવાનગીનો ભેદ સમજી નહિ શકો

પ્રેમની પાછળ પ્રથમ સર્વસ્વ હારીને જુઓ

હરકદમની ઓથમાં મંજિલ છુપી છે દોસ્તો,

માત્ર ખામી તો છે, જોવામાં જ ઢાળીને જુઓ

એજ છે સૌ પ્રેમીઓની જિન્દગી કેરો ચિતાર

કંટકો વચ્ચે મહેંકતી પુષ્પ ક્યારીને જુઓ

દર્દ સૌ તમને તમારા અલ્પ દેખાશે પછી,

બે ઘડી સાથે મુસાફિરના ગુજારીને જુઓ

-મુસાફિર પાલનપુરી

Photo by D.Gajjar,7th Floor Sahyadri ,National Highway, Amd.