હરિ દે છે, હરિ લે છે, નમન તેને કરી લઉ છું

સ્વયં જીવન ગુરુ થઈ બોધ દે અનુભવ ગ્રહી લઉ છું

હજારો વર્ષથી ચાલ્યા જ આવે આ દિવસ ને રાત,

પલક જે ઉઘડે તે પલને શુભ પ્રભાત ગણી લઉ છું

***

જીવનભર સેવા કરનારા શ્રવણ સમ દિકરા જોયાં

અને જીવતાજી ઘા કરનાર કપાતર પથ્થરા જોયાં

સ્વજનનું સુખ જોઈ ઊઠતી અંતરમાં જ્વાળાઓ

ઠરાવી અન્યને મુરખ સ્વયં બનતાં ખરા જોયાં

મળે અપમાન દિકરી બેનને જન્મીને જે ઘરમાં

અતિલાડેથી વંઠેલા પિતાના પોતરા જોયાં

બને ક્યાં ગુણપૂજક કર્મકાંડી કાચલા ધરતા,

પ્રભુના ધામની પાસે પડેલાં છોતરા જોયાં

જમાડ્યા વિણ ફકત ઉપદેશ દીધે રાખે માણસને

અતિ લોભી અતિ કામી ગુરુઓ ખાઉધરાં જોયાં

અપંગ માલિકનું રાખે ધ્યાન જીવનમાં મરણને બાદ

કબર ઉપર વફાના ફૂલ ધરતાં કૂતરા જોયાં

હ્દયમાં ભાવ કે ના પ્રેમ ઉપરછલ્લો કરે વ્યવહાર

પ્રદર્શન દંભનું દેખાડનારા નોતરાં જોયાં

કદી પાપોથી પસ્તાઈ ‘દિલીપ’ બદલાય છે માનવ

ક્ષણિક સંસારના સુખમાં દિવસ પણ આકરા જોયાં

-દિલીપ ગજ્જર