લેસ્ટરવાસી પર બાપૂ કરતાં નજર…

“We must become the change we want to see”

યુ.કે.નું લેસ્ટર

એજ મારું શહેર

લીલુંછમ શહેર મુજ

વૃક્ષથી છે સભર

વિશ્વ માનવ અહીં

સંસ્કૃતીથી સભર

બેલગ્રેવ રોડ પર

ઈન્ડિયાની અસર

લેસ્ટરવાસી પર

બાપૂ કરતાં નજર

-દિલીપ ગજજર,લેસ્ટર

ખુબ આનંદની વાત છે કે લેસ્ટરના બેલગ્રેવ રોડ પર પસાર થતા હવે તમને જુદી જ ઝલક પલકભરમાં દેખાઈ જશે..

સ્વીટ સોની અને સારીની હારબંધ દુકાનોમાત્ર હવે ત્યાં નથી હારબંધ ટ્રાફીકલાઈટ ઉપરાંત

ગાંધી બાપૂ તરફ તમારી નજર ગયા વિના નહિ રહે અને બાપુ પણ તે જ સમયે તમને કશુ કહ્યા વિના નહિ રહે…

અંતઃકરણના અરિસાની સ્વચછતા પર તે નિર્ભર છે જો ટ્યૂનિંગ બરાબર હશે તો જરુર તીવ્ર પ્રેરણા આપ્યા વિના નહિ રહે..

કેવું રીએક્શન બાપુ તરફ થાય છે તેના પરથી આત્મનિરીક્ષણ કરવું ઘટે કે,

કિં નુ મે સતપુરુષ યા કિં નુ મે પશુતુલ્ય ઈતિ ?

૨૬મી જુનના રોજ લેસ્ટરના બેલગ્રેવ રોડની બાજુમાં ગાંઘીબાપુની પ્રતિમાનું અનાવરણ

બ્રીટનના હોમ સેક્રેટરી એલન જોન્સનના હસ્તે થયું.

સમન્વય પરિવારે આ મૂર્તિનો ખર્ચ આપેલ ,કલકતાના શિલ્પકાર પાલ દ્વારા આ પ્રતિમા ઘડાયેલ.

લેસ્ટરવાસીઓ માટે તથા સર્વ માનવ માટે આ ખુબ જ ગૌરવની વાત રહી અને સંદેશો કોતરેલ હતો,…

“We must become the change we want to see”

ફૂલ, કળી, તરુવર ને પક્ષી સુંદર છે

ગઝલ

ફૂલ, કળી, તરુવર ને પક્ષી સુંદર છે

કારણ કે ઉપવનનો માળી સુંદર છે

ઝરણાં, સાગર, પર્વત, વૃક્ષો ને માનવ

દ્રુષ્ટિ હો તો દુનિયા આખી સુંદર છે

મનભાવન રંગો જેમાંથી નીતરતાં

ચિત્રકારની પીંછી કેવી સુંદર છે !

શા માટે ત્યાં ભાત પડે ના રંગીલી

કોડીલી કન્યાની હથેળી સુંદર છે

કેફ હશે કેવો હું ‘સાગર’ શું જાણું

અલબત એ સાકી ને સુરાહી સુંદર છે.

-કિશોર ‘સાગર’

Photo-Dilip Gajjar

દુનિયા મેં જોઈ છે-હરિભાઈ કોઠારી Audio

03 Duniya me joi chhe 1મુક્તક

ખિલેલાં પુષ્પ જગના બાગમાં ખુશ્બુ લૂટાવે છે

જગતના સૌ વિરોધાભાસ સહી વિકાસ સાધે છે

હરિના માર્ગ પર કેવળ શૂરા પરમાર્થ ને ઝંખે

ઉભા રહી દ્વારની વચ્ચે દલાલો સ્વાર્થ સાધે છે

-દિલીપ ગજજર

વેદોનો જીવનવાદ લઈ, વિજયી થઈને વિશ્વે વિચરે;

એ આર્ય સનાતન સાચો છે, છોડી અકાર્ય  જે કાર્ય કરે !

છે પરાક્રમી, ના ખાટીક છે; છે કલાકાર ના લંપટ છે;

શક્તિ-સુંદરતા બેઉ પ્રભુચરણે ધરનાર પૂજારી છે !

-હરિભાઈ કોઠારી

એક રંગ કંકુ ને એક રંગ લોહી છે

ભૂલ કેમ ખાઉ કહો, દુનિયા મેં જોઈ છે

બગલા ને હંસ વિષે દિસતો ના ભેદ ભલે,

ધોળું બધું દૂધ ગણી બુદ્ધિ ના મોહી છે

મીઠાના પાણીમાં આંસુનો સ્વાદ ભલે

પલમાં પિછાણું જો આંખડી કો રોઈ છે

કાગડાની કાળાશે કોયલ ના ઢંકાતી

જગને ડોલાવે એ કોયલની બોલી છે

મહેલોના ખ્વાબ ઘણાં ભડકે બળે છે જગે

કુટિયા કો ઘાસતણી હસતી મેં જોઈ છે

અસલી ને નકલીના ભેદ તો બતાવે કાળ

કો’દિ ના બુરાઇથી ભલાઈ એણે તોલી છે

-હરિભાઈ કોઠારી

To listen this song clik on link above photo, Dilip with Haribhai Kothari in Leiceter 2003

Singer: Rekha Trivedi

પરમ પૂજ્ય પ્યારા પિતાને નમું છું…

જગતઃ પિતરો વન્દે પાર્વતિ પરમેશ્વરો

પરમ પૂજ્ય પ્યારા પિતાને નમું છું

અવિભાજ્ય તેના સ્મરણમાં સરું છું

જતનથી ઉછેર્યો ગટરમાં ન ફેંક્યો

પિતા-માતા-ધાતાને  વંદન  કરું છું

નિરાકાર ઘટને તેં આકાર દીધો

ગુણોના પ્રદાતાને પૂષ્પો ધરું છું

મળી ભેટ ઉત્તમ પ્રથમ ખુદને ચાહુ

જીવનદાતામાં ઈશદર્શન કરું છું

રુએ રુએ તવ રુણ ઉપકાર અગણિત

જો ચાહુ ચૂકવવા ક્યાં ચુકવી શકુ છું

ભણાવ્યો ,ગણાવ્યો ,રમાડ્યો, હસાવ્યો

કૃતઘ્ની બની ગાળ ક્યાં દઈ શકુ છું ?

અનાયાસ પૂછે કોઈ નામ તારું

વિગતવાર હું તારી ગાથા વદુ છું

હું તારો તું મારો બીજું કૈ ના જાણું

જગે તેથી નિર્ભય બનીને ફરું છું

ઓ બાપા, દિપા શું ? ગીતાગાન ગાઉં ?

હવે તારું મલકાતું મુખડું સ્મરું છું

અહોભાગ સંસ્કાર અંતિમ કર્યા’તા

હું યે અગ્નિપથ પર પલેપલ સરું છું

કરી હું શકુ છું, બની હું શકું છુ,

હું કંકરથી શંકર બની પણ શકું છું

નથી દીન ‘દિલીપ’ મળ્યો વારસો જે

અનુભવનો વૈભવ વહેંચતો રહું છું

-દિલીપ ગજજર, લેસ્ટર

સપનાની વાત સાચી પડે તો ગઝલ કહું

હસતો ચહેરો રાખીને પરદેશમાં ફરતાં રહ્યાં

પણ વતનની યાદથી લ્યો ,આંખ આ ભીંજાઈ ગઈ

આજે કવિમિત્ર હારુન પટેલ ની એક ગઝલ રજુ કરું છુ.આશા છે  રસિકોને ગમશે,

ગઝલ

સપનાની વાત સાચી પડે તો ગઝલ કહું

તારી કશેક ભાળ મળે તો ગઝલ કહું

અજવાશ આ કેવો કે દઝાડે છે રોમરોમ

સૂરજ આ અવદશાનો ઢળે તો ગઝલ કહું

કરવી છે વાત મારે વાત વિગતવાર ઝ્ખ્મની

દિલમાં જરાક દર્દ વધે તો ગઝલ કહું

જીવનના સીધા સાદા સવાલોમાં રસ નથી

પ્રશ્નોમાં જરા ગૂંચ પડે તો ગઝલ કહું

દૌબારા, વાહવાહનો ઘોંઘટ શું કરું

દિલથી કોઈ ઈર્શાદ કહે તો ગઝલ કહું

મારું તમારું એમનું છે દર્દ આ દિલમાં

આ દર્દથી રાહત જો મળે તો ગઝલ કહું

દુર્ભાગ્ય મારું એવું કે તું તો મળી નહીં

તારા જ જેવું કોઈ મળે તો ગઝલ કહું

‘હારુન’ સમી સાંજમાં અંધારું થઈ ગયું

યાદોના દીપ દિલમાં જલે તો ગઝલ કહું

-હારુન પટેલ,બોલ્ટન

તેમના ‘તરસ એઅક દરિયાની’ ગઝલ સંગ્રહમાંથી

વતનની ધૂળને ગઝલાંજલિ

વતનની ધૂળના એકેક કણને સાચવજો

ને આરપાર આ વિસ્તરતા રણને સાચવજો

હવાને, બાગને ,વહેતા ઝરણને સાચવજો

ને હેમખેમ આ વાતાવરણને સાચવજો

યુગોના ભારેલા અગ્નિની રાખ ખંખેરી

સમયના ચોકમાં એકેક ક્ષણને સાચવજો

ક્યહીં ન હાથથી છટકીને આપને વાગે

હવામાં ઉંચે ઉગામેલા ઘણને સાચવજો

આ દુનિયા જાય જહન્નમમાં તો જવા દેજો

કોઈના નામના પ્રાતઃસ્મરણને સાચવજો

બીજા બધાને ઉપરવાળો સાચવી લેશે

બની શકે તો તમે એક જણને સાચવજો

‘કશો જ અર્થ નથી’ કહેવુંયે નિરર્થક છે

આ ભૂંડી ભાષાના પોપટરટણને સાચવજો

તિમિરને તેજના મિશ્રણ ઉપર બધો આધાર

સિતારા ચાંદ ને સૂરજકિરણને સાચવજો

વતનની ધૂળ વિખેરાઈ જાય તે પહેલાં

વતનની ધૂળના સૌ સંસ્મરણને સાચવજો

દબાઈ જાય ના કીડીના કાફલા ‘આદિલ’

વિજયની કૂચમાં ધસમસ ચરણને સાચવજો

વતનની ધૂળને ગઝલાંજલિ

-આદિલ મન્સૂરી

૧૮મી માર્ચ, ૨૦૦૨. ન્યૂ યોર્ક

કંઠ -દિલીપ ગજ્જર અને રોશની શેલત, સંગીતબદ્ધ-નારાયણ ખરે

શ્રવણ સમ દિકરા જોયાં…

હરિ દે છે, હરિ લે છે, નમન તેને કરી લઉ છું

સ્વયં જીવન ગુરુ થઈ બોધ દે અનુભવ ગ્રહી લઉ છું

હજારો વર્ષથી ચાલ્યા જ આવે આ દિવસ ને રાત,

પલક જે ઉઘડે તે પલને શુભ પ્રભાત ગણી લઉ છું

***

જીવનભર સેવા કરનારા શ્રવણ સમ દિકરા જોયાં

અને જીવતાજી ઘા કરનાર કપાતર પથ્થરા જોયાં

સ્વજનનું સુખ જોઈ ઊઠતી અંતરમાં જ્વાળાઓ

ઠરાવી અન્યને મુરખ સ્વયં બનતાં ખરા જોયાં

મળે અપમાન દિકરી બેનને જન્મીને જે ઘરમાં

અતિલાડેથી વંઠેલા પિતાના પોતરા જોયાં

બને ક્યાં ગુણપૂજક કર્મકાંડી કાચલા ધરતા,

પ્રભુના ધામની પાસે પડેલાં છોતરા જોયાં

જમાડ્યા વિણ ફકત ઉપદેશ દીધે રાખે માણસને

અતિ લોભી અતિ કામી ગુરુઓ ખાઉધરાં જોયાં

અપંગ માલિકનું રાખે ધ્યાન જીવનમાં મરણને બાદ

કબર ઉપર વફાના ફૂલ ધરતાં કૂતરા જોયાં

હ્દયમાં ભાવ કે ના પ્રેમ ઉપરછલ્લો કરે વ્યવહાર

પ્રદર્શન દંભનું દેખાડનારા નોતરાં જોયાં

કદી પાપોથી પસ્તાઈ ‘દિલીપ’ બદલાય છે માનવ

ક્ષણિક સંસારના સુખમાં દિવસ પણ આકરા જોયાં

-દિલીપ ગજ્જર

પ્રેમ જોવો છે તો-મુસાફિર પાલનપુરી

ગઝલ

પ્રેમ જોવો છે તો દ્વારે આવકારીને જુઓ

એ ન લાગે ઠીક તો જાતે પધારીને જુઓ

આમ નીરખી નહિ શકો આ દર્દમય દિલને તમે

આંખ પરથી ગર્વના પડદા ઉતારીને જુઓ

સ્હેજમાં દિવાનગીનો ભેદ સમજી નહિ શકો

પ્રેમની પાછળ પ્રથમ સર્વસ્વ હારીને જુઓ

હરકદમની ઓથમાં મંજિલ છુપી છે દોસ્તો,

માત્ર ખામી તો છે, જોવામાં જ ઢાળીને જુઓ

એજ છે સૌ પ્રેમીઓની જિન્દગી કેરો ચિતાર

કંટકો વચ્ચે મહેંકતી પુષ્પ ક્યારીને જુઓ

દર્દ સૌ તમને તમારા અલ્પ દેખાશે પછી,

બે ઘડી સાથે મુસાફિરના ગુજારીને જુઓ

-મુસાફિર પાલનપુરી

Photo by D.Gajjar,7th Floor Sahyadri ,National Highway, Amd.

જીવતરના પાઠ-રમેશ પટેલ(આકાશદીપ)

જીવતરના પાઠ

 

પ્રભુ વંદના પ્રભાતિયાથી પાંગરતી શુભ સવાર

ફળિયું નાનું લાગે વ્હાલું, ઘર ઘરના રમનાર

ગામને પાદર ગોવાળોને, ગેડી દડાનો સાથ

હસતાં રમતાં શેરીએ ચાલ્યા, ભેરુઓના વ્હાલ

સ્નેહે ભીંજાયા પાડોશીના ને દીઠા મમતાના મોલ

ગામનો ચોરો કૂવાન્નો કાંઠો , સંધાતા વાતોના દોર

માયા મમતા દિલથી મોટા, સુખદુખના સંગાથી

દુનિયાદારી કોઠા સૂઝથી નાખ્યા ઉખાણા ઉકેલી

યૌવન આવ્યું પાદર છોડ્યું પાઠ જીંદગીના જાણ્યા

વાયુ વેગે વહી જીંદગી , પૈસા પાછળ દોડ્યા

સંસારની વાડી ફૂલી ફાલી, વીત્યા દિવસને રાત

સમૃધ્ધિ દેખી ભૂલ્યા નીજને, મનડું ચડ્યું ચગડોળ

જોબન જાતાં વારના લાગી, તૂટ્યા હામને જોમ

ઘડપણની વ્યથા દેહનાં કામણ આજે છે કરમાણાં

વ્હાલા વેરી સમજે નકામા ,પાદર થયા પરદેશ્

સમયની કરવટ, સ્નેહની સરવાની આજે છે સૂકાઈ

ભાગ્યા ભેરુ ભૂલ્યા સંગાથી, કરમની છે કઠણાઈ

લીલા નીરખી કુદરત તારી ભજીએ અંતરયામી

દીધી શીખ જીવનની રીત મધ્યમ માર્ગી રહીએ

જીવતરના પાઠ સત્સંગી થઈ એકબીજાના થઈએ

રમેશ પટેલ(આકાશદીપ)