પ્રેમની એક નજર જોઈએ

DSCF0078

પ્રિય મિત્રો, આપણી સમક્ષ એક ગઝલ તસ્વીર સાથે રજુ કરું છું આશા છે ગમશે

સાગરો માં સમાઈ જવા એક નદી સમ સફર જોઈએ
જિંદગીની  સફર  માણવા  રાહમાં  હમસફર જોઈએ

પ્રેમ ઓછો નથી જાણવા પ્રેમની એક નજર જોઈએ
પાત્ર  કુપાત્ર જોતો નથી  બસ હૃદય તરબતર જોઈએ

પારકા લઇ ઉછીના સ્તવન યંત્રવત કંઈ ખુશામત કરે
વાણી કે માંગણી  બુદ્ધિથી છે  પરે તે અસર જોઈએ

મંદિરો  મસ્જીદો ચર્ચના  લેબલોના  ભરમ હોય ના,
માત્ર સામ્રાજ્ય હો પ્રેમનું એક અનોખું નગર જોઈએ

શોધતા અન્યના જે દિલે સુક્કા રણમાં ભટકતા રહે,
સ્નેહવર્ષા   કરે  અંતરે   ભાવભીની   કદર  જોઈએ 

નામ ને રૂપ તેના હજાર શબ્દ સર્જન પણ તેના હજાર
ચેતના ચોતરફ  વિસ્તરે સ્નેહ  સરહદની પર  જોઈએ 

દીર્ઘ લાંબા શિયાળા સમી જિંદગીની કહાની દિલીપ
એક  ટૂંકી  ગઝલ  ગુફત્ગુ   જેમ  ટૂંકી બહર  જોઈએ

-દિલીપ ગજજર

Advertisements
Posted in અવર્ગીકૃત | 14 Replies