સમય કહે છે તક તક તક તક

સમય કહે છે તક તક તક તક
મૃત્યુ કહી દે કટ કટ કટ કટ

અગ્નિ પથ પર શાંત મુસાફર
મિત્ર બનીને ધપ ધપ ધપ ધપ

સંશય પલભર પ્રેમ નિરંતર
દિલ તૂટે છે તડ તડ તડ તડ

ગંગામાં જઈ મારે ડૂબકી
પ્રેમ પ્રવાહે શક શક શક શક

ધરતી પરના ઉત્તમ મોતી
આંખોમાંથી ટપ ટપ ટપ ટપ

હો લોયલ કે ચીટર તો પણ
પોતાની પર હસ હસ હસ હસ

પૃથ્વી પટ પર થઇ આભારી
દિલમાં તેના વસ વસ વસ વસ

-દિલીપ ગજજર

જેને સર્જ્નમાં રસ છે !

Snow Drops Hearts Photo by DGajjar

પ્રિય મિત્રો, વિશ્વકર્મા જયંતિ નિમિત્તે, થોડી પંક્તિઓ રજુ કરું છું આશા છે ગમશે.

કેટલાં વિરોધ કે અવરોધ કરતા હોય છે

ખૂબ થોડાં સત્યને સાકાર કરતા હોય છે

વિશ્વકર્મા વંશ છું ના ધર્મ મારો ધ્વંસનો,

જગમહીં કલાકાર સરજન શ્રેષ્ઠ કરતા હોય છે

નાચો ગાઓ કરો આનંદ ईशावास्यम ईदम सर्वम

જગે વસંતનો ઉત્સવ, ક્યાં   नैराश्यम ईदम सर्वम

રડે જન્મી રડે મરતાં जीवन रोना है क्या लल्लू ?

સદા હસતા રહી ફેલાવી દો,  हास्यम ईदम सर्वम

જેને સર્જ્નમાં રસ છે

તેના જીવનમાં કસ છે

સુંદર નજરે જોયું તો

તુજ ચેહરો ખૂબ સરસ છે

સ્નેહના મીઠા લાડૂ વ્હેંચો

વિશ્વકર્મા તેરસ છે

હિતકારત પ્રવૃત્તિમાં

સાહિત્યે બસ સબરસ છે !

છે માયાવી ક્ષણભર તો પણ

સપનામાં સૌને રસ છે !!

નિરાશા વ્યાપી મનમાં

તેમાં ના કંઈ રસકસ છે

પ્રેમ પ્રિયાનો ના ભૂલાતો

પ્રેમભર્યું દિલ ખૂબ સરસ છે

તું ના મારો, તો પણ તારો

‘દિલીપ’ અંતિમ વારસ છે !

 

આવજો !

આપ સમક્ષ,ભારત જતાં મિત્રને સ્વાસ્થ્ય શુભેચ્છા અંગે આ પોષ્ટ રજુ કરું છું

આવજો !

ના નહી આવું કહી ના અલવિદા કહેડાવજો

આવજો બસ જલ્દી સારા નરવા થઈને આવજો

જંગ લડવા જાવ છો વિજયી બનીને આવજો

રોગ  દુર્ગુણો વિકારોને  હરાવી આવજો

મિત્રતા પરચમ ઉચેરો આભમાં લહેરાવજો

મિત્રતાના ઈત્રને ચારે તરફ પ્રસરાવજો

આંધીઓમાં ઈશ અંતરદીપ જલતો રાખજો

અલવિદા કહેતો નથી હસતે મુખે  બસ આવજો

ઊડ્જો ઊંચા ગગનમાં મુક્ત મનથી ઊડ્જો…

આવજો બસ નવજીવન પાછું લઈને  આવજો

આંસુઓ ના સારજો  દુર્બળ વિચારો ભાગજો

સાચવી જડીબુટ્ટીઓ પાસે લઇ  સુંઘાડજો

ઉરમહી  ઉમંગની  ગાગર છલકતી રાખજો

સપ્તરંગી આંખમાં આંજીને સપના આવજો

સ્વાસ્થ્ય મારા મિત્રનું પોષક પ્રભુ તવ હાથમાં

હાથ જોડી પ્રાર્થું તમને હે પ્રભુ સંભાળજો

વેદના આશિષ તમને  જીવજો સો સો શરદ

હા કવિની દૃષ્ટિએ અવલોકવા જગ આવજો

નામ સંબંધોના લૌકિક  સ્થાપવા શાને હવે

માનવે માનવ્યના  સન્માન મનમાં ધારજો

સર્વ સીમાઓની પેલે પાર પર જેનું  મૂલ્ય છે

તાંદુલી એ  તત્વનું ના મૂલ્ય ઓછું આંક્જો ..

એક દીપક દિલમહી જલતો જરા સંકોરીને

સોળ શણગારો સજી લઇ પ્રિયતમ રીઝાવજો

લોક દર્શન કાજ છોને દેવસ્થાનો પર જતાં

આપ થઇ અંતર સખા  મુજ અંતરે બીરાજજો

 

-દિલીપ ઈલા અને યોગીશાની

અંતરની શુભેચ્છાઓ

૨૨.૧૨.૨૦૧૦

વહાલું વતન -રમેશ પટેલ(આકાશદીપ)

વહાલું વતન

બાંધતી ભાવે ભારતી પાવન બંધન

અવતરતા શ્રીપતિ છોડી ગગન

ધીંગી ધરાએ નીપજ્યા અમૂલખ રતન

વહાલું વતન મારું વહાલું વતન

પૂર્યા શ્રધ્ધાથી અમે પથ્થરમાં પ્રાણ

ગાયાં અમે સંસારે ગીતાનાં જ્ઞાન

કરુણા અહિંસાથી સીંચ્યાં સ્નેહનાં સીંચન

વહાલું વતન મારું વહાલું વતન

સાગરની ભરતી પખાળતી ચરણ

પંખીડાં ગીત ગાઇ કરતાં રંજન

પ્રગટાવ્યાં પૃથ્વી પર પ્રેમનાં સ્પંદન

વહાલું વતન મારું વહાલું વતન

હેતથી હિમાળો ગાતો પુનિત કવન

સંપદાથી શોભતાં વગડાને વન

પાવન સરિતાને કરીએ વંદન

વહાલું વતન મારું વહાલું વતન

સંતોને વીરોની ભૂમિ આ મહાન

કરતા રખવાળી માની જોશીલા જવાન

સીંચતો ત્રિરંગો કણકણમાં શૂરાતન

વહાલું વતન મારું વહાલું વતન

પ્રાણથીય પ્યારી પુનિત ધરતી મંગલ

કરશું વંદન શીરે બાંધી કફન

વટને વચનથી કરશું જતન

વહાલું વતન મારું વહાલું વતન

પંદરમી ઓગસ્ટે જૂમે ત્રિરંગો ગગન

અહિંસા આદરથી રેલાવીએ અમન

સંસ્કૃતિની શોભાથી વિશ્વ થાતું મગન

વહાલું વતન મારું વહાલું વતન

રમેશ પટેલ(આકાશદીપ)

વાંસલડી ડોટ કોમ – કૃષ્ણ દવે

Painting by Dilip Gajjar

મિત્રો, ચાલો આજે પરંપરાથી જરા જુદી રીતે કવિમિત્ર કૃષ્ણ દવેનું વાંસલડી ડોટ કોમ ગીત માણીએ,…. જન્માષ્ટમી ઉત્સવ ..પ્રથમ જન્મ અને બીજા જ દિવસે જેનું જીવન ઉત્સવ તરીકે ઉજવાવા લાગ્યું આખું ગોકુળ થનગનવા લાગ્યું તેનું ઘેલું આજ પણ કવિ ગાયકો અને પ્રેમીઓને ભક્તોને આબાલવ્રુદ્ધ સહુને છે..દિને દિને નવં નવં નમામિ નંદ સંભવમ.. એવા કૃષ્ણ આજના સંદર્ભમાં પણ કોમ્પ્યુટર યુગમાં ઈન્ટરનેટ ઉપર વાંસલડી ડોટ કોમ બનીને દોડી આવે છે ત્યારે ઈન્ટરનેટ ઉપર સરફીંગ કરનાર અને બ્લોગર્સનો આનંદ પણ વધી જાય છે… સમય સાથે રહે તે સાધારણ અને સમય કરતાં આગળ વધે તે અસાધારણ..કૃષ્ણ સમય કરતા પહેલાં જન્મ્યા છે તેથી ફ્યુચરાસ્ટીક લાગે છે…

વાંસલડી ડોટ કોમ

વાંસલડી ડોટ કોમ, મોરપિચ્છ ડોટ કોમ, ડોટ કોમ વૃંદાવન આખું,

કાનજીની વેબસાઈટ એટલી વિશાળ છે કે કયા કયા નામ એમાં રાખું ?

ધારો કે મીરાબાઈ ડોટકોમ રાખીએ તો રાધા રિસાય એનું શું ?

વિરહી ગોપીનું ગીત એન્ટર કરીએ ને ક્યાંક ફ્લોપી ભિંજાય અએનું શું ?

પ્રેમની આ ડિસ્કમાં તો એવી એવી વાનગી કે કોને છોડું ને કોને ચાખું ?

ગીતાજી ડોટ કોમ એટલું ઉકેલવામાં ઉકલી ગઈ પંડિતની જાત.

જાત બળી જાય છતાં ખ્યાલ ના રહે ને એ જ માણે આ પૂનમની રાત

તુલસી, કબીર, સુર, નરસૈયો થઈએ તો ઉકલે છે કંઈક ઝાંખું ઝાખું.

એ જ ફકત પાસવર્ડ મોકલી શકે છે જેના સ્ક્રીન ઉપર નાચે છે શ્યામ.

એને શું વાયરસ ભૂસીં શકવાના જેના ચીર પૂરી આપે ઘનશ્યામ ?

ઈન્ટરર્નેટ ઉપર એ થનગનતો આવે, હું કોઈ દિવસ વિન્ડો ના વાખું.

-કૃષ્ણ દવે

તેમના ‘વાંસલડી ડોટ કોમ’ સંગ્રહમાંથી

તે ઓડિઓ આલ્બમનું મને ટાઇટલ બનાવવા મળ્યું હતું જે સદભાગ્ય કહી શકાય.

ફૂલ, કળી, તરુવર ને પક્ષી સુંદર છે

ગઝલ

ફૂલ, કળી, તરુવર ને પક્ષી સુંદર છે

કારણ કે ઉપવનનો માળી સુંદર છે

ઝરણાં, સાગર, પર્વત, વૃક્ષો ને માનવ

દ્રુષ્ટિ હો તો દુનિયા આખી સુંદર છે

મનભાવન રંગો જેમાંથી નીતરતાં

ચિત્રકારની પીંછી કેવી સુંદર છે !

શા માટે ત્યાં ભાત પડે ના રંગીલી

કોડીલી કન્યાની હથેળી સુંદર છે

કેફ હશે કેવો હું ‘સાગર’ શું જાણું

અલબત એ સાકી ને સુરાહી સુંદર છે.

-કિશોર ‘સાગર’

Photo-Dilip Gajjar

પ્રેમ જોવો છે તો-મુસાફિર પાલનપુરી

ગઝલ

પ્રેમ જોવો છે તો દ્વારે આવકારીને જુઓ

એ ન લાગે ઠીક તો જાતે પધારીને જુઓ

આમ નીરખી નહિ શકો આ દર્દમય દિલને તમે

આંખ પરથી ગર્વના પડદા ઉતારીને જુઓ

સ્હેજમાં દિવાનગીનો ભેદ સમજી નહિ શકો

પ્રેમની પાછળ પ્રથમ સર્વસ્વ હારીને જુઓ

હરકદમની ઓથમાં મંજિલ છુપી છે દોસ્તો,

માત્ર ખામી તો છે, જોવામાં જ ઢાળીને જુઓ

એજ છે સૌ પ્રેમીઓની જિન્દગી કેરો ચિતાર

કંટકો વચ્ચે મહેંકતી પુષ્પ ક્યારીને જુઓ

દર્દ સૌ તમને તમારા અલ્પ દેખાશે પછી,

બે ઘડી સાથે મુસાફિરના ગુજારીને જુઓ

-મુસાફિર પાલનપુરી

Photo by D.Gajjar,7th Floor Sahyadri ,National Highway, Amd.

માણસનો દેખાવ જુદો છે-કુતુબ ‘આઝાદ’

આજથી ચૈત્ર મહિનાની શરુઆત થઈ..શાલિવાહન શક મુજબ નવા વર્ષની શરુઆત..

એક મિત્રે પ્રવચનમાળા વાંચ્યા પછી સંબુદ્ધ રહ્સ્યદર્શિએ કહેલુ કોટ કર્યુ કે, ‘માણસ હજી ભટકતો રહેલો છે…’

એક કવિ કુતુબ આઝાદ આજે તેઓ આપણી વચ્ચે નથી મારે તેમને બગસરામાં મળવાનું થયેલુ…

તેઓ માણસ વિષે શું કહે છે તે ચાલો વાંચીએ વિચારીએ અને ચૈત્ર એટલે કે ચિત્ર અને વિચિત્ર એવા આ સંસારમાં

બાલકનું વિસ્મય રાખી જોઈએ જીવીએ જાણીએ અનુભવીને સંદેશો લેતાં રહીએ

જેથી જિવનવિકાસના રસ્તે પડતાં જાય એક એક કદમ….

જુદો છે-

માણસનો દેખાવ જુદો છે

માણસનો વર્તાવ જુદો છે

ઉપરથી દેખાય છે સુંદર

અંદરથી અએ સાવ જુદો છે

મીઠી મીઠી વાત કરે છે

કિન્તુ પાછળ દાવ જુદો છે

કોઈ દિવસ પણ રુઝાશે નહિ,

જીવ કરે એ ઘાવ જુદો છે

નક્કી આજે છેતરી લેશે,

હાવ જુદો છે હાવ જુદો છે

મરતાં ને મર નહિ કહું હું,

હા, મારો સ્વભાવ જુદો છે

હસતાં હસતાં જીવી જાઓ,

જીવન કેરો લ્હાવ જુદો છે.

-કુતુબ ‘આઝાદ’

કેટલાયે માનવો આવી ગયા by Dilip Gajjar

  

કેટલાયે   માનવો   આવી    ગયા 

ખૂબ  થોડા  જિન્દગી જીવી  ગયા 

ગામથી  તો  શ્હેરમાં જઈને વસ્યા 

શહેરથી   પરદેશમા  પ્હોચી  ગયા 

આમ  અમને  આ ધરા નાની પડી 

ચન્દ્ર  પર  ને   મંગળે  ઉડી  ગયા 

માનવીના  મન  સુધી તો ના ગયા 

ઈશને   પાડોશમાં    ચૂકી    ગયા 

ધ્યેય   વિનાની  ગતિથી   દોડતાં 

આખરે  પાછા  ઘરે  આવી  ગયા 

આવતા  ઘરમાં  જરા  મોડુ  થયું 

ક્યાં મને મૂકી દિલીપ, ચાલી ગયા

by dilip gajjar

from collection of gazal, Anterdeep

 

શું શું નથી પરદેશમાં -બેદાર લાજપુરી